ថ្ងៃទី០២ ខែធ្នូ ឆ្នាំ២០២០ ឯកឧត្តម  ផាន់ ចាន់ធុល អភិបាលខេត្តប៉ៃលិន អមដំណើរ ដោយ ឯកឧត្តម ចេង ញ៉ាន់ អភិបាលរងខេត្ត និងក្រុមការងារ បានអញ្ជើញបើកការដ្ឋាន សាងសង់ផ្សារសាមគ្គីខេត្តប៉ៃលិន (ផ្សារប៉ាហ៊ី) ផ្នែកខាងលើមួយទៀត បន្ទាប់ពីមានសំណូម ពររបស់បងប្អូនអាជីករ ស្ថិតក្នុងភូមិប៉ាហ៊ីជើង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។

ឯកឧត្តមបានបានមានប្រសាសន៍ថា៖ ការបើកការដ្ឋានសាងសង់ផ្សារផ្នែកខាងលើនេះដើម្បីសម្រួលតាមការស្នើរសុំរបស់អាជីវករលក់ដូរយើង ដោយមើលឃើញថាផ្សារផ្នែកខាងលើនេះធ្វើអំពីឈើប្រក់សង្ក័សីមានសភាពចាស់ទ្រុតទ្រោមដែលងាយនឹងមានហានិភ័យខ្ពស់។ ឯកឧត្តមបានស្នើដល់គណៈកម្មការផ្សារ អាជីវករ និងអាជ្ញាធរពាក់ព័ន្ធ សហការគ្នា សាងសង់ផ្សារថ្មីឱ្យបានឆាប់រហ័ស  ដើម្បីឆាប់បានដំណើរការលក់ដូរឡើងវិញ។ 

ឯកឧត្តមអភិបាលខេត្តក៏បានមានប្រសាសន៍ស្នើដល់មន្ត្រីជំនាញ ត្រូវសិក្សាគម្រោងសាងសង់ឱ្យបានច្បាស់លាស់ទៅតាមស្តង់ដាបច្ចេកទេសត្រឹមត្រូវ ដើម្បីធានាបាននូវយូរអង្វែង ជាពិសេសសំណូមពរដល់អាជីវករលក់ដូរដែលមានតូបនៅក្នុងផ្សារធ្វើថ្មីនេះត្រូវមានការយោគយល់និងរួមសហការគ្នាជាមួយមន្រ្តីជំនាញ ដើម្បីងាយស្រួលនិងឆាប់ដំណើរការលក់ដូរឡើងវិញ។

សូមបញ្ជាក់ថា៖ ផ្សារដែលចាប់ផ្តើមសាងសង់ថ្មីនេះ មានបណ្តោយ ៧០ម៉ែត្រ និងទទឹង១៣ម៉ែត្រ ដែលធ្វើពីដែក ប្រក់ដំបូលសង័្កសី ដោយប្រើពេលសាងសង់រយៈពេល ២ខែ។

 

តមកនៅក្នុងថ្ងៃដដែលនោះផងដែរ ឯកឧត្តម  ផាន់ ចាន់ធុល អភិបាលខេត្តប៉ៃលិន អមដំណើរ ដោយ ឯកឧត្តម ចេង ញ៉ាន់ អភិបាលរងខេត្ត និងក្រុមការងារ បានញញ្ជើញចុះសំណេះសំណាលសួរសុខទុក្ខ និងផ្សព្វផ្សាយពីវិធានការបង្ការ ទប់ស្កាត់ការរីករាលដាលជម្ងឺកូវីដ-១៩ ក្នុងព្រឹត្តិការណ៍២៨ វិច្ឆិកា ដល់បងប្អូនអាជីវករលក់ដូរនៅក្នុងផ្សារសាមគ្គីខេត្តប៉ៃលិន (ផ្សារប៉ាហ៊ី)។

ឯកឧត្តមបានបានមានប្រសាសន៍ថា៖  នៅក្នុងព្រឹត្តិការណ៍សហគមន៍ ២៨ វិច្ឆិកា ជំងឺឆ្លងមេរោគគូវីដ-១៩ បានឆ្លងក្នុងសហគមន៍ ដូច្នេះហើយសូមអោយបងប្អូនអាជីវករលក់ដូរទាំងអស់ត្រូវមានការប្រុងប្រយ័ត្នខ្ពស់នៅកន្លែងលក់ដូររបស់យើងដោយដាក់អាកុល ជែល ជាប់ជាប្រចាំ ដើម្បីបាញ់ការពារនៅពេលដែលមានបងប្អូនប្រជាពលរដ្ឋមកទិញរបស់របរប្រើប្រាស់ប្រចាំថ្ងៃ។ ជាពិសេសសូមអោយម្ចាស់អាជីវករនានាត្រូវពាក់ម៉ាសការពារអោយបានត្រឹមត្រូវ និងនៅគម្លាតអោយឆ្ងាយពីគ្នាយ៉ាងតិចមួយម៉ែត្រ។

ឯកឧត្តមក៏បានអគុណដល់បងប្អូនអាជីវករដែលបានពាក់ម៉ាស និងមានអាកុល ជែលដាក់តាមតូបលក់ដូររបស់ខ្លួន ដែលនេះជាការចូលរួមចំនែកជាមួយរាជរដ្ឋាភិបាល និងក្រសួងសុខាភិបាល ជាពិសេសបើបងប្អូនមានអាការៈអ្វីមួយមិនស្រួលត្រូវឆាប់ទៅមន្ទីរពេទ្យជាបន្ទាន់ដើម្បីពិនិត្យមើលរោគ ជៀសវាងទុកនៅយូរអាចបង្ករជាគ្រោះថ្នាក់ដល់យើង និងប្រទេសជាតិ។ ជាចុងក្រោយឯកឧត្តមក៏បានក្រើនរំលឹកដល់បងប្អូនអាជីវករលក់ដូរទាំងអស់ត្រូវធ្វើតាមការណែនាំរបស់ក្រសួងសុខាភិបាល និងរាជរដ្ឋាភិបាល ដើម្បីរួមគ្នាទប់ស្កាត់ការរីករាលដាលជម្ងឺកូវីដ-១៩៕