នាព្រឹកថ្ងៃច័ន្ទ ៩រោច ខែកក្តិក ឆ្នាំជូត ទោស័ក áž–.ស២៥៦៤ ត្រូវនឹងថ្ងៃទី៩ ខែវិច្ឆិកា ឆ្នាំ២០២០ រដ្ឋបាលខេត្តប៉ៃលិនបានរៀបចំពីធីអបអរសាទរខួបអនុស្សាវរីយ៍លើកទី៦៧នៃទីវាបុណ្យឯករាជ្យជាតិ    ៩វិច្ឆិកា១៩៥៣-៩វិច្ឆិកា២០២០ និងទិវាកំណើតនៃកងយោធពលខេមរភូមិន្ទ នៅចំណុចរង្វង់មូលវិមានឯករាជ្យខាងមុខសាលាខេត្តប៉ៃលិន ក្រោមអធិបតីភាពឯកឧត្តមនាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយខេត្តប៉ៃលិន។ វត្តមានអញ្ជើញចូលរួមនាឱកាសនោះមាន ឯកឧត្តម កើត សុធា ទីប្រឹក្សារាជរដ្ឋាភិបាល ឯកឧត្តម សៅ សារ៉ាត់ ប្រធានក្រុមម្រឹក្សាខេត្ត ឯកឧត្តម ផាន់ ចាន់ធុល អភិបាលនៃគណអភិបាលខេត្តប៉ៃលិន ឯកឧត្តម- លោកជំទាវសមាជិកក្រុមប្រឹក្សាខេត្ត ឯកឧត្តម- លោកជំទាវ អភិបាលរងខេត្ត លោកមេបញ្ជាការ បញ្ជាការរង និងពលទាហាន នៃកងកំលាំងប្រដាប់អាវុធទាំងបីប្រភេទ លោកប្រធាន អនុប្រធានមន្ទីរ មន្រ្តីរាជការ ព្រះសង្ឃ យុវជន ស.ស.áž™.ក, យុវជនកាយរឹទ្ធ, យុវជនក១៥៧, លោកគ្រូ អ្នកគ្រូ សិស្សានុស្ស និងប្រជាពលរដ្ឋយ៉ាងច្រើនកុះករ។

តាមអំណានស័ង្កថារបស់ឯកឧត្តម ផាន់ ចាន់ធុល អភិបាលនៃគណអភិបាលខេត្តប៉ៃលិន បានអោយដឹងថា៖ ការប្រារព្វខួប អនុស្សាវរីយ៍លើកទី៦៧នៃទីវាបុណ្យឯករាជ្យជាតិ៩វិច្ឆិកា និងទីវាកំណើតនៃកងយោធពលខេមរភូមិន្ទ គឺដើម្បីសំដែងនូវមនោសញ្ចេតនា សោមនស្សរីករាយអបអរសាទរនូវទិវាជាប្រវត្តសាស្រ្តនៃព្រះរាជាណាចក្រកម្ពុជា ដែលកំលាំងមហាសាមគ្គីនៃប្រជាជាតិកម្ពុជាទាំងមូលប្រយុទ្ធ ពុះពារដណ្តើមបានមកវិញទាំងស្រុងពីអាណានិគមនិយមបារាំងនាថ្ងៃទី៩ ខែវិច្ឆិកា ឆ្នាំ១៩៥៣ ធ្វើអោយប្រទេសកម្ពុជាយើងទទួលបាននូវឯករាជ្យពេញបរិបូរណ៍ ក្រោមព្រះរាជបូជនីយកិច្ចដ៏ថ្លៃថ្លាឧត្តុង្គឧត្តម របស់ព្រះករុណាព្រះបាទសម្តេចព្រះនរោត្តមសីហនុ ព្រះមហាវីរៈក្សត្រ ព្រះបិតាឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ។ ក្នុងឱកាសដ៏ឧត្តុង្គឧត្តមថ្លៃថ្លានេះ យើងទាំងអស់គ្នាសូមឧទ្ទិសអោយស្មារតីថ្ងៃ៩វិច្ឆិកា ជាទិវាប្រវត្តសាស្រ្តនេះ បានដក់ជាប់ក្នុងស្មារីកូនខ្មែរគ្រប់ជំនាន់ ចងចាំនូវប្រវត្តសាស្រ្តដ៏អង់អាចក្លាហាន និងប្រពៃណីដ៏រុងរឿងរបស់កងយោធពលខេមរភូមិន្ទយើង។ ស័ង្កថា បានបន្តថា៖ កងយោធពលខេមរភូមិន្ទនៃព្រះរាជាណាចក្រកម្ពុជាបានចាប់ផ្តើមកើតដំបូងចេញពីអនុសញ្ញាបារាំង-ខ្មែរនាថ្ងៃទី៧ ខែមករា ឆ្នាំ១៩៤៦ ដែលអនុសញ្ញានេះបានបញ្ជាក់ថា ប្រទេសកម្ពុជាមានកំលាំងយោធាដែលសុទ្ធតែជាខ្មែរ។ អនុញ្ញានេះបានបញ្ជាក់ពីបេសកកម្មរបស់កងយោធពលខេមរភូមិន្ទ ដែលត្រូវធានាអះអាងចំពោះអធិបតីភាពរបស់ព្រះករុណាព្រះចៅក្រុងកម្ពុជា គោរពច្បាប់ និងធានាសណ្តាប់ធ្នាប់ សន្តិសុខផ្ទៃក្នុងទូទាំងព្រះរាជាណាចក្រកម្ពុជា ចូលរួមក្នុងកិច្ចការព្រំដែននៃប្រទេសកម្ពុជា ព្រមទាំងបានគ្រោងនឹងបង្កើតសាលានាយទាហាន សាលានាយទាហានរងសម្រាប់ធានាការបណ្តុះបណ្តាលក្របខណ្ឌនេះទៀតផង។ ចាប់ពីថ្ងៃទី២ ខែកញ្ញា ឆ្នាំ១៩៥៣ ដល់ថ្ងៃទី២០ ខែកក្កដា ឆ្នាំ១៩៥៤ ជារយៈកាលបញ្ចាប់អាទិភាពនៅលើទឹកដីឥណ្ឌូចិន របស់អាណានិគមនិយមបារាំងសេស ព្រះរាជាណាចក្រ កម្ពុជាទទួលបានឯករាជ្យពេញបរិបូរណ៍ និងជាថ្ងៃចាប់កំណើតពិតប្រាកដ ជាផ្លូវការនៃកងយោធពលខេមរភូមិន្ទ ហើយដែលពេលនោះបានបង្កើតជាអគ្គសេនាធីការនៃកងយោធពលខេមរភូមិន្ទ  បញ្ជាការដ្ឋានកងទ័ពជើងអាកាសភូមិន្ទ  និងបញ្ជាការដ្ឋានកងទ័ពជើងទឹកភូមិន្ទ។ ទោះបីក្នុងអតីតកាលប្រទេសកម្ពុជាស្ថិតក្នុងស្ថានភាពមានបញ្ហាវិប័ត្តបយោបាយ គ្រោះធម្មជាតិធ្ងន់ធ្ងរ បញ្ហាអសន្តិសុខផ្ទៃក្នុង យ៉ាងណាក្តី  រហូតមកដល់ពេលបច្ចុប្បន្ននេះ កងយោធពលខេមរភូមិន្ទនូវតែអាចរក្សាបាននូវតួនាទីរបស់ខ្លួនជាកម្លាំងរឹងមាំ ការពាររាជរដ្ឋាភិបាលប្រកបដោយជោគជ័យ រួមចំណែករក្សាបានគង់វង្សនូវសុខ សន្តិភាពជូនជាតិ មាតុភូមិបានដល់បច្ចុប្បន្នដោយមិនមានរង្គោះរង្គើឡើយ។ ស័ង្កថាបានបន្តថា៖ ទោះជាយ៉ាងណា ក្រុមជនអគតិតែងតែប្រើប្រាស់គ្រប់ល្បិចកល មធ្យោបាយគ្រប់បែបយ៉ាង រៀបចំផែនការជាប្រព័ន្ធ ញុះញង់ អុជអាល បង្កចលាចល ដើម្បីបំផ្លាញសន្តិភាព ស្ថេរភាពនយោបាយ សន្តិសុខ សណ្តាប់ធ្នាប់សង្គម បម្រើមហិចតានយោបាយល្មោភអំណាចរបស់ពួកគេ ក្នុងគោលដៅផ្តួលរំលំរាជរដ្ឋាភិបាលស្របច្បាប់។ សន្តិភាពមានតម្លៃមិនអាចកាត់ថ្លៃបានឡើយ ហេតុនេះទោះបីក្នុងកាលៈទេសៈណាក៏ដោយ កងកំលាំងប្រដាប់អាវុធរបស់ជាតិ មន្រ្តីរាជការ ប្រជាពលរដ្ឋ ត្រូវតែប្តេជ្ញាចូលរួមការពាអោយបាននូវសន្តិភាព ដើម្បីបង្ករឱកាសដល់ការអភិវឌ្ឍប្រទេសជាតិ ការពាររដ្ឋធម្មនុញ្ញ ការពារព្រះមហាក្សត្រ  និងការពាររាជរដ្ឋាភិបាលដែលកើតចេញពីឆន្ទះរបស់ប្រជាពលរដ្ឋ ហើយត្រូវចងចាំចថា បើគ្មានសម្តេចតេជោហ៊ុន សែន ក៏គ្មានសន្តិភាព និងគ្នានការអភិវឌ្ឍដូចសព្វថ្ងៃនេះដែរ។

ឯកឧត្តម នាយឧត្តមសេនីយ៍ អ៊ី ឈាន រដ្ឋលេខាធិការក្រសួងការពារជាតិ និងជាប្រធានក្រុមការងាររាជរដ្ឋាភិបាលចុះជួយខេត្តប៉ៃលិន បានមានប្រសាសន៍ថា ប្រទេសកម្ពុជាយើងទទួលបាននូវសុខ សន្តិភាពពេញបរិបូរណ៍នៅក្នុងឆ្នាំ១៩៩៨ ក្រោមនយោបាយឈ្នះ ឈ្នះ របស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ដែលបានធ្វើអោយប្រជាជនកម្ពុជាទទួលបាននូវសេចក្តីសុខចំរើន មានផ្ទះសំបែង មានកម្មសិទ្ធដីធ្លី និងមានការអភិវឌ្ឍជាលំដាប់នៅក្នុងមូលដ្ឋានរបស់ខ្លួន។ ដូច្នេះយើងត្រូវចងចាំ និងដឹងគុណដល់សម្តេចតេជោ ហ៊ុន សែន ក៏ដូចជាថ្នាក់ដឹកនាំគ្រប់លំដាប់ថ្នាក់ យុទ្ធជន កងទ័ពយើងដែលបានពលីកម្មគ្រប់បែបយ៉ាងដើម្បីបុព្វហេតុនៃសុខ សន្តិភាព ដែលយើងរកបានដោយកម្រនេះ។ ឯកឧត្តមបានបន្តថា មកដល់បច្ចុប្បន្ននេះ រាជរដ្ឋាភិបាលមានការយកចិត្តទុកដាក់ខ្ពស់លើការបោះបង្គោលព្រំដែនជាមួយប្រទេសជិតខាង ដែលជាការគិតគូ ទទួលខុសត្រូវខ្ពស់បំផុតរបស់រាជរដ្ឋាភិបាលក្នុងការការពារបូរណភាពទឹកដីរបស់យើងអោយបានគង់វង្ស ហើយដែលបញ្ហានេះក្រុមជនអគតិកំពុងយកធ្វើជាប្រធានបទរិះគន់ អុជអាល និងបង្ករអោយមានភាពវិកវរក្នុងសង្គមយ៉ាងខ្លាំង។ យើងត្រូវជឿលើខ្លួនឯង ជឿលើការដឹកនាំដ៏ត្រឹមត្រូវរបស់រាជរដ្ឋាភិបាល តែមិនត្រូវជឿលើជនអគតិទាំងនោះឡើយ។ ឯកឧត្តមក៏បានណែនាំអោយប្រជាពលរដ្ឋទាំងអស់ត្រូវមានការប្រុងប្រយ័ត្នក្នុងការការពារខ្លួនកុំអោយឆ្លងជំងឺកូវីដ១៩ ដែលជាជំងឺឆ្លងជាសកលកំពុងរាតត្បាតនៅក្នុងប្រទេសជាច្រើននៅលើសកលលោក។ យើងអាចភ្លេចជំងឺកូវីដ១៩ តែជំងឺនេះមិនភ្លេចប្រជាពលរដ្ឋយើងទេ ដូច្នេះអ្វីដែលប្រជាពលរដ្ឋយើងចាំបាច់ត្រូវធ្វើ គឺត្រូវអនុវត្តអោយបានខ្ចប់ខ្ជួនតាមការណែនាំរបស់រាជ  រដ្ឋាភិបាល ដោយត្រូវពាក់ម៉ាស់គ្រប់ពេល ត្រូវរក្សាគម្លាតពីមនុស្សម្នាក់ទៅមនុស្សម្នាក់អោយបានសមស្រប និងត្រូវលាងដៃជាមួយសាប៊ូ ឬទឹកអាលកុលអោយបានញឹកញ៉ាប់ ជាដើម៕


វួច ពឿន